Глобалдык таэквон-до GTF федерациясынын Президенти (Ф. Белосо), Кыргыз Республикасынын Министрлер Кабинетине караштуу Дене тарбия жана спорт боюнча мамлекеттик агенттигинин директору (У. Асанбаев) жана Азия таэквон-до GTF федерациясынын Президенти (А. М. Кадыров) тарабынан бекитилген. Кыргыз Республикасынын Таэквон-до GTF федерациясынын Президенти (А. М. Кадыров) менен макулдашылган.

I. Жалпы жоболор

1.1. Мелдештин максаттары жана милдеттери:

• Азияда таэквон-до GTF’ти жайылтуу жана өнүктүрүү;
• спортчулардын чеберчилигин жогорулатуу;
• эл аралык байланыштарды чыңдоо.

1.2. Мелдеш «Глобалдык таэквон-до GTF федерациясы» коомдук бирикмелердин эл аралык союзу тарабынан бекитилген Мелдештин эрежелерине жана Мелдештерди өткөрүү жөнүндө жобого ылайык өткөрүлөт.

II. Уюштуруучулардын укуктары жана милдеттери

1. Мелдешти даярдоого жана өткөрүүгө жетекчилик кылуу

1.1. Мелдешти даярдоого жана өткөрүүгө жалпы жетекчиликти төмөнкүлөр жүзөгө ашырат:

• «Глобалдык таэквон-до федерациясы (GTF)» коомдук бирикмелердин эл аралык союзу (мындан ары – GTF);
• Азия таэквон-до GTF федерациясы (мындан ары – АФ GTF);
• Кыргыз Республикасынын Таэквон-до GTF федерациясы (мындан ары – ТФ GTF);
• Кыргыз Республикасынын Министрлер Кабинетине караштуу Дене тарбия жана спорт боюнча мамлекеттик агенттик;
• GTF Президенти бекиткен Уюштуруу комитети.

1.2. Мелдешти түздөн-түз өткөрүү GTF Президенти бекиткен Башкы калыстар коллегиясына (мындан ары – БКК) жүктөлөт.

1.3. БКК ушул Жобонун бардык жоболорунун сакталышы үчүн жооп берет. Ал калыстарды дайындайт жана алардын ишинин сапатын көзөмөлдөйт. БКК ушул мелдешке катышкан спорттук уюмдардын жетекчилеринин сын-пикирлерин кабыл алат жана эске алат.

1.4. Атайын техника жана күч менен сындыруудан башка бардык дисциплиналар «GTF Kalys» электрондук калыстык системасынын жардамы менен реалдуу убакыт режиминде бааланат.

1.5. Бардык аянтчалардан (татамилерден) реалдуу убакыт режиминде онлайн видеотрансляция жүргүзүлөт.

2. Катышуучуларга коюлган талаптар жана катыштыруу шарттары

2.1. Мелдешке дүйнөдө таэквон-до GTF’ти өнүктүргөн жана GTF мүчөсү болгон улуттук уюмдардын спортчулары катыштырылат.

2.2. Таэквон-до GTF боюнча Азия чемпионатына төмөнкүлөр катыштырылат:

• 18–37 жаштагы эркектер жана аялдар.

2.3. Таэквон-до GTF боюнча Азия биринчилигине төмөнкүлөр катыштырылат:

• туулган датасы боюнча юниорлор жана юниоркалар (15–17 жаш);
• туулган датасы боюнча өспүрүм уландар жана кыздар (12–14 жаш);
• туулган датасы боюнча балдар жана кыздар (10–11 жаш).

2.4. Спортчулардын техникалык квалификациясы төмөнкүдөй болушу керек:

• эркектер жана аялдар, ардагерлер – 1-дандан (кара кур) төмөн эмес жана 5-дандан (кара кур) жогору эмес;
• юниорлор жана юниоркалар (15–17 жаш) – 2-гыптан (кызыл кур) төмөн эмес жана 3-дандан (кара кур) жогору эмес;
• өспүрүм уландар жана кыздар (12–14 жаш) – 2-гыптан (кызыл кур) төмөн эмес жана 2-дандан (кара кур) жогору эмес;
• балдар жана кыздар (10–11 жаш) – 4-гыптан (көк кур) төмөн эмес жана 1-дандан (кара кур) жогору эмес.

2.5. Спортчулар төмөнкүлөр болгон учурда катыштырылат:

• улуттук уюмдун жетекчиси күбөлөндүргөн расмий өтүнмө – бир өлкөдөн бирөө;
• медициналык камсыздандыруу (машыгууларга жана таэквон-до боюнча турнирлерге байланыштуу кырсыктардан же жаракаттардан);
• спортчунун техникалык квалификациясын тастыктаган GTF сертификаты (кара курлар үчүн) же улуттук уюмдун сертификаты (түстүү курлар үчүн);
• спортчунун инсандыгын күбөлөндүргөн документ (улуттук паспорт же туулгандыгы тууралуу күбөлүк).

2.6. Мелдешке катышуу үчүн спортчуда бекитилген үлгүдөгү жабдуулар болушу керек (толук топтом милдеттүү):

• таэквон-до GTF добогу;
• таэквон-до GTF баш коргоочусу (шлем) – 6 жаштан баштап милдеттүү;
• таэквон-до GTF кол коргоочулары (ачык алакан кол кап);
• таэквон-до GTF бут таман коргоочулары;
• таэквон-до GTF жилик коргоочулары – 10 жаштан баштап милдеттүү;
• чурай коргоочу;
• ооз коргоочу (капа) – 8 жаштан баштап милдеттүү;
• аялдар үчүн көкүрөк коргоочу – 12 жаштан баштап милдеттүү;
• билек коргоочулар – каалоосу боюнча.

2.7. GTF Мелдештин эрежелерине ылайык жабдуулардын (шлем, кол кап жана бут таман коргоочулары) түсү спортчунун бурчунун түсүнө (көк же кызыл) шайкеш келиши керек.

2.8. Жеке дисциплиналарда ар бир категорияга ар бир улуттук уюмдан экиден ашык эмес спортчу катыштырылат.

2.9. Командалык мелдештерде «хёнг – командалык», «массоги – командалык», «күч менен сындыруу – командалык» жана «атайын техника – командалык» дисциплиналарында улуттук уюмдан бир команда катыштырылат; тэг-тим (поинт-стоп – командалык) жана «хёнг – жуптар» дисциплиналарында эки команда катыштырылат.

2.10. Мелдешти кабыл алуучу тарап жеке мелдештердин ар бир категориясына эки курам (4 адамдан ашык эмес), командалык мелдештерге 2 команда, тэг-тим (поинт-стоп – командалык) жана «хёнг – жуптар» дисциплиналарына 3 команда коюуга укуктуу.

2.11. «Хёнг – командалык», «массоги – командалык» жана «поинт-стоп – командалык» дисциплиналарында команданын курамы ар бир дисциплина үчүн өзүнчө түзүлөт.

3. Кийим формасы

3.1. Калыстардын кийим формасы таэквон-до GTF эрежелерине ылайык болушу керек: кочкул көк пиджак (бекитилген үлгүдө), кочкул көк шым, узун жеңдүү ак көйнөк (кошумча оюу-чийме, жазуу жана башка кооздуктарсыз), кочкул көк галстук (бекитилген үлгүдө) жана ак спорттук бут кийим.

3.2. Сынакка чыккан спортчуга секунданттык кылган машыктыруучулар спорттук костюмда жана спорттук бут кийимде болушу керек.

3.3. Катышуучуларда белгиленген эрежелерге ылайык GTF добогу болушу керек.

III. Мелдеш жөнүндө жалпы маалымат

1. Өткөрүлүүчү жери жана мөөнөтү

Өткөрүлүүчү жери: Кыргыз Республикасы, Бишкек шаары, «Жаштык Арена» спорт комплекси, Тоголок Молдо көчөсү, 17/7.

Өткөрүлүүчү мөөнөтү: 2026-жылдын 24–30-ноябры.

2. Мелдештин программасы

Мелдеш күнү салмак өлчөө жүргүзүлбөйт.

3. Катышуучулар жана категориялар

4. Өтүнмөлөр

4.1. Бекитилген үлгүдөгү алдын ала өтүнмөлөр (1-тиркеме) 2026-жылдын 20-октябрына чейин GTF штаб-квартирасына [email protected] электрондук дарегине жөнөтүлөт.

4.2. Өтүнмөлөр 2026-жылдын 10-ноябрына чейин gtf.global порталы аркылуу кабыл алынат. Өтүнмөнүн түп нускасы спортчуларды катыштыруу боюнча комиссияга тапшырылат.

4.3. Алдын ала өтүнмөсүз келген командалар же спортчулар мелдешке катыштырылбайт.

4.4. Салмак өлчөө учурунда өтүнмөгө киргизилген ар кандай өзгөртүү (салмактын, гыптын, дандын, спортчунун маалыматтарынын же катыша турган дисциплиналардын өзгөрүшү) ар бир спортчу үчүн USD 10 өлчөмүндөгү кошумча төлөмгө алынат.

5. Жыйынтыктарды аныктоо

5.1. Жеке жана командалык мелдештердин жеңүүчүлөрү жана байге ээлери таэквон-до GTF боюнча мелдештердин колдонуудагы эрежелерине ылайык аныкталат.

5.2. Жалпы командалык эсеп: 1-орунду ээлеген спортчу жалпы командалык эсепке 3 упай, 2-орун – 2 упай, 3-орун – 1 упай алып келет.

6. Жеңүүчүлөрдү жана байге ээлерин сыйлоо

6.1. Жеке мелдештердин жеңүүчүлөрү жана байге ээлери (1, 2 жана 3-орундар) болгон спортчулар Кыргыз Республикасынын Министрлер Кабинетине караштуу Дене тарбия жана спорт боюнча мамлекеттик агенттигинин медалдары жана дипломдору менен сыйланат.

6.2. Командалык мелдештердин жеңүүчү жана байге ээси болгон командалары (1, 2 жана 3-орундар) кубоктор менен сыйланат. Ал командалардын курамындагы спортчулар Кыргыз Республикасынын Министрлер Кабинетине караштуу Дене тарбия жана спорт боюнча мамлекеттик агенттигинин медалдары жана дипломдору менен сыйланат.

6.3. Улуттук курама командалар жалпы командалык эсептин жыйынтыгы боюнча тиешелүү даражадагы кубоктор жана дипломдор менен сыйланат.

6.4. Демөөрчүлөр жана башка уюмдар тарабынан кошумча байгелер белгилениши мүмкүн.

6.5. Абсолюттук чемпиондор кубоктор менен сыйланат:

• 10–11 жана 12–14 жаш – «хёнг», «массоги» жана «поинт-стоп» жеке дисциплиналарында үч биринчи орун;
• 15–17 жаш – төрт биринчи орун: «хёнг», «массоги», «поинт-стоп» жана «атайын техника»;
• 18+ жаш – беш биринчи орун: «хёнг», «массоги», «поинт-стоп», «атайын техника» жана «күч менен сындыруу».

IV. Каржылоо

Бардык чыгымдарды (катышуучулардын, команда өкүлдөрүнүн, машыктыруучулардын жана калыстардын жол кире, тамак-аш жана жашоо чыгымдарын) жиберүүчү уюмдар көтөрөт. Уюштуруучулар мелдеш күндөрү иштеген бардык калыстарды акысыз тамак-аш менен камсыз кылат.

V. Катышуу төгүмү

GTF Президиумунун чечимине ылайык таэквон-до GTF боюнча Азия чемпионатына жана биринчилигине катышуу төгүмү төмөнкүнү түзөт:

• бир дисциплина үчүн USD 80;
• ар бир кийинки дисциплина үчүн USD 20.

VI. Медициналык камсыздоо

Медициналык жана тез медициналык жардамды өз убагында көрсөтүү максатында мелдеш залында бүткүл мелдеш күнү бою медициналык бригада (бир дарыгер жана бир медайым), ошондой эле бекитилген унаасы бар тез медициналык жардам бригадасы – ар бир мелдеш күнүнө бир бригададан кезметте турат.

VII. Иш-чаранын коопсуздугу

Мелдешти коопсуз өткөрүүнү камсыз кылуу максатында өткөрүлүүчү жайдын негизги кире бериштеринде жана уюштуруучулар берген мейманканаларда улуттук курама командалар жашаган жерлерде коопсуздук кызматынын кызматкерлери кезметте турат. Ошондой эле бүткүл мелдеш күнү бою (ар бир мелдеш күнү аяктаганга чейин) коомдук тартипти жана коомдук коопсуздукту камсыз кылган стюарддар жана башка персонал кезметте турат.

VIII. Катышуучуларды камсыздандыруу

Мелдешке катышуу ар бир катышуучунун өмүрүн жана ден соолугун кырсыктардан камсыздандырууну тастыктаган документтер болгондо гана мүмкүн; бул документтер каттоо учурунда катыштыруу боюнча комиссияга тапшырылат. Катышуучуларды камсыздандыруу жиберүүчү уюмдардын эсебинен жүргүзүлөт.

IX. Аккредитация

Таэквон-до GTF боюнча Азия чемпионатынын жана биринчилигинин катышуучулары үчүн делегацияларды кабыл алуу боюнча уюштуруу кызматтарынын толук топтомун камтыган бирдиктүү аккредитация системасы каралган. Аккредитация делегациянын ар бир мүчөсүнө (спортчуларга, машыктыруучуларга, калыстарга, өкүлдөргө жана коштоп жүрүүчү адамдарга) таризделет.

Аккредитация бардык катышуучулар – спортчулар, машыктыруучулар, калыстар, өкүлдөр жана коштоп жүрүүчү адамдар үчүн милдеттүү. Жарактуу аккредитациясыз таэквон-до GTF боюнча Азия чемпионатына жана биринчилигине кирүүгө уруксат берилбейт.

Аккредитациянын наркына төмөнкүлөр кирет:

• Жашоо – «стандарт» категориясындагы сунушталган мейманканаларда (эки жана үч орундуу бөлмөлөр): The Plaza Hotel Bishkek, B Hotel, Park Hotel Bishkek;
• Тамак-аш – мелдеш күндөрү эртең мененки жана кечки тамак;
• Трансфер – «Манас» эл аралык аэропортунда тосуп алуу жана узатуу, «мейманкана – «Жаштык Арена» спорт комплекси – мейманкана» каттамы боюнча күн сайын трансфер;
• Аккредитация бейджи;
• Иш-чаранын бүткүл мезгилинде делегацияны уюштуруучулук жана маалыматтык коштоо.

Бирдиктүү аккредитациянын наркы бир кишиге суткасына USD 85 түзөт жана жогоруда саналган бардык кызматтарды камтыйт (7 түн жашоо, тамак-аш (эртең мененки, кечки тамак), трансфер, уюштуруу төгүмү).

Делегациянын өтүнүчү боюнча кошумча Бишкек шаары жана анын айланасы боюнча маданий-экскурсиялык программа уюштурулушу мүмкүн.

Аккредитация жана брондоо 2026-жылдын 20-октябрына чейин аякташы керек. Аккредитация, жашоо, трансфер жана визалык колдоо боюнча бардык суроолор үчүн: e-mail [email protected], тел. +996 (771) 11-22-22.